中国头一个远洋轮船个船长，是崇明人陈干青，吴淞商船学堂个毕业生。

　　1913年冷天，陈干青到轮船浪实习，看见船长是个高鼻头绿眼睛个外国人，问带班个先生，明明是中国个船，为何让外国人当船长？先生朝伊话，革是外国人按照弗平等条约硬性规定个，一千吨朝上个轮船，船长胎常要外国人当个，弗然，英国人把勒勒个海关弗发营业执照个。伊听子恨来交关，脱同学讲：“得力点，学好子本事当船长，拿航海权收转来。”

　　陈干青进子上海一家轮船公司，总经理叫伊到轮船浪当三副。

　　革是一只来去日本个出洋轮船，三副当到一定个辰光，要脱大副、二副轮流开船。陈干青晓得，革种机会是弗轻容易个，故所以一到船浪，就弄清爽子革条航线浪个情况，大副、二副开船个辰光，伊跟班勒边头，一眼弗霎个看，一点一点记勒肚皮里。

　　过子半年把，英国船长要陈干青一干子开船到日本去，皮笑肉勿笑问：“来斯弗来斯？”陈干青挺起子胸脯话：“有处个。”

　　话是好讲，做出来是呒得能便当个，一干子勒驾驶室里，呒得人商量，全靠自家。路浪一歇末起风特，一歇末落雨特，一歇末忽闪雷响特，夜更盲生更加要小心。陈干青拿出子学着个本事，顺顺当当拿船开到子日本。

　　船浪个中国人朝伊翘翘大节头：“有种，让外国人晓得中国人也会开远洋轮船个，爱要比夷特开勒好嘞。”

　　总经理也蛮高兴个，话陈干青帮中国人张子一口气，提升伊当子二副。

　　陈干青开轮船个机会更加多特，伊晓得当船长还要经过一趟考试，各落老早准备，纤常自家考自家，譬如讲，熟悉子一条航线末要求开新航线，人家弗敢开个所在伊要开，革是为子学勒门槛精点。

　　一天夜来发子大风特，开船个大副一弗当心撞勒石头浪，船撞坏脱海水也钻进来特，船浪个人有汛吓来漉漉抖，有汛吓来哭出来。船长是个日本人，平常落地口气大来秃是本事，革辰光是眼睛一霎一霎像淋雨癞沟把，弗晓得哪能好。要紧关头陈干青出点子话，近边有个暗沙，豪燥铲到暗沙浪，拗拨船沉下去。

　　船长脱子大副大眼斋小眼，小眼斋白眼，裁弗敢开。革是为何呐？风浪能着力，单怕爱碰勒暗礁浪，真要一天烧羹饭特。救人要紧，陈干青弗客气特，调转船头，雀结子风朝前开，不过七八分钟，船浪个人有个朝前一磕，有个朝后一仰，轮船搁勒沙滩浪特。好特，船弗会沉脱特，船浪个人眼眼哭作闭闭，现在裁有子笑眼特，像抢卅一样叫陈干青“救命恩人”。

　　1919年春里，陈干青又升级特，当子轮船浪个大副，成子船浪个第二号人物。伊看重个弗是做勒大，是离当船长个梦想越来越近特，因为船长弗勒船浪个辰光，大副代做船长。打革歇开始，伊暗洞里拿学个物事，裁放勒勒哪能当船长浪厢。

　　革一天到底来特，总经理作仗升伊做船长特。

　　前头讲过，要当船长个人，先要到英国人把勒勒个海关考试，前头有蛮多中国人考过，一个也弗宁考着。陈干青是蛮气个，也是蛮恨个，对朋友话：“中国人勒自家个船浪当船长，爱要让外国人考试批准，拨外国人欺来革能样子，真是眼泪落得出！”

　　考官是港务长弗莱斯，眼乌子朝陈干青翻子一翻话：“海轮是全世界裁要跑个，各个国家港口个水情地貌晓得伐？航海天文晓得伐？”陈干青对伊讲：“我是中国国立商船学堂个毕业生，革些知识是应当晓得个。”

　　弗莱斯阴弗阴阳弗阳话：“好啊，革末就试试看。”掼过来两个题目。陈干青想也弗宁想，滑滑落落答出来特。弗莱斯又来几个问题，裁是蛮难个，哪晓得陈干青又裁答对特，看上去笃定泰山浪来交关。

　　下半天笔试，弗莱斯个题目出勒交关促掐，陈干青老早作仗好个特，要晓得个物事裁弄勒跌熟烂番瓜，顿也弗打“刷刷刷刷”对直写。

　　弗莱斯拿过考卷横看竖看，实在寻勿出雀疤，不过伊爱是弗想让陈干青过关，话爱要口试勒，拿出《国际船舶避碰章程》，翻到哪革条，就要陈干青背。困梦头里也弗宁想到，陈干青一字弗差背出来特。爱来几条，又背勒一字弗差。

　　看样子是难勿倒陈干青个特，弗莱斯气来鼻头管两个洞，哭作乌拉扛扛肩胛话：“你算是考着特，恭喜恭喜。”

　　航海史浪赤刮拉新个一页：中国有子第一个海轮船长特。陈干青个名字响来划跃跃，革也是我俚崇明人个光荣。