“田财田财，我俚发财”、“田财田财，大家发财”，革是正月半夜里厢掼田财辰光喊个，上下八沙孩晓得个。

　　掼田财是崇明人过正月半个老传统，清朝搭子民国个《崇明县志》里孩有得记个，内地少来些个，有处算是我俚崇明闹元宵个特别节目嘞！

　　民情风俗为何能够一代一代传下来，因为得有“功利”个，像过年吃鱼象征年年有余，正月半吃馄饨象征兜财，掼田财是向田公公求花地收勒多、发财，《民俗上海·崇明卷》里讲个就是革能意思。

　　田财是哪样式个？脱火把差勿多，崇明俗称田财把，是用柴草扎出来个。扎田财把个柴草，要拣熬火个，像芦柴、豆箕、芝麻楷勒汛，大约摸酌扎勒三头四寸粗细，四五尺长，两只手好拿好掼为准。一家人家要扎好几个，革样子块块地皮里孩能掼着。

　　革歇掼田财个多数是男客家，也有男小囡掼个，男当家个凑巧弗勒屋里，一年只一趟个机会，何人家高兴错过？

　　上初中个辰光，正月半夜里搭子学生子一道去掼田财，掼子两个嫌勒弗煞念，看见外门才好婆特个扁豆棚勒边头，正好派用场特，扯下来拔拔长卷出来，连搭当棚架个小竹头一道扎勒里，掼起来又旺又熬火，还“噼噼啪啪”响勒。后来子想想，自说自话拿人家个扁豆棚当田财掼脱，是弗作兴个，去朝才好婆自首，生怕惹骂，朝伊话也勒伊特地皮浪掼个，大家发财。老人家本来是弗大开心，听我革样子一话，面浪有子笑眼特，连话“呒要紧个，呒要紧个。”

　　记得一年又一年正月半夜里厢，农民伯伯匼子田财到自家田里，点旺子一边走一边掼，嘴里喊：“田财田财，我俚发财，棉花开勒碗口大，杜米个头尺把长，稻穗头长勒像牛尾巴。”

　　边头田块里也有人勒掼田财，也勒喊“田财田财，我俚发财”。革辰光大家拔结子胡咙喊，孩要喊勒比别人响，三条泯沟四条港孩听见。为何呀？听老辈里话，喊勒越响越发财。

　　也有人喊个的是“田财田财，大家发财”，勒边头看个听个大家开心，孩话伊是“老好人”、“心平”。

　　有人私心重或者寻开心，喊个是：“田财田财，我俚发财，我俚个棉花萝朵像鹅蛋大，别人家个棉花萝朵像白眼大。我俚个稻箩像青山大，别人家个稻箩像汤罐大。”

　　解放以后，党和人民政府加强教育，农民伯伯觉悟提高特，“田财田财，我俚发财”孩变子“田财田财，大家发财”。

　　后来子强调阶级教育，又有新个喊法特：“田财田财，大家发财，我俚个棉花萝朵像鹅蛋大，粮户人家个棉花萝朵像白眼大。”“田财田财，大家发财，我俚个稻箩像青山大，粮户人家个稻箩像汤罐大。”八十年代出版的《崇明县歌谣谚语》里，就是革样子印个。